News feature: Vigan STAC, namnama dagiti ubbing nga addaan ‘disabilities’

VIGAN CITY, Ilocos Sur, Set 29 (PIA) –- Ragsak ti marikna ti siasinoman a sumrek iti Vigan Stimulation and Therapeutic Activity Center (STAC) a masarakan iti public market annex iti daytoy a siudad. Ditoy ngamin a makita ken marikna ti pannakaipaay ti naisulsalumina a pannakatagiben dagiti ubbing a nayanak wenno nakaala ti sakit a nangted kadakuada ti saan a normal a biag – dagiti makunkuna nga ubbing nga addaan ‘disabilities’.

Iti Oktobre 1 maselebraran ti maika-lima a tawen ti sentro ken ti misionna kadagiti agindeg. Iti pannakalagip ti 9th Cerebral Palsy Awareness and Protection Week iti intero a pagilian, iti maikatlo a lawas ti Setiembre napan ti nagsurat iti daytoy a sentro. Ditoyna a naimatangan ti panagiinnarakup ti panagbayabay dagiti nagannak ken dagiti empleado kangrunaan ti mangmangted ti physical therapy a ni Kriejielyn Asistin nga isu met laeng ti mangimatmatun ti sentro. Adda lima nga empleado ti gobierno ti ciudad nga agtrabtrabaho iti sentro.

Kuna ni Kriejielyn nga addan innem a simmayaat nga ubbing nga addaan ti cerebral palsy ken delayed motor development. Makapagnadan, makataray, makalagtodan nga awan ti mangtultulong kadakuada. Daytoy ket kalpasan ti maysa a tawen wenno nasurok a pannakatherapyda iti sentro.

Ti ubing nga addaan cerebral palsy ket dagitay addaan problema ti panagkutida ken poturada. Daytoy a sakit ket gapu ti pannakasugat ti utek wenno problema iti tiempo a masikog ti ina, iti panagpasangayna wenno iti las-ud ti 2 wenno 3 a tawen ti biag ti ubing. Mabalin a makaigapu ti nasapa a pannakayanak, saan a makanay ti mapan kanniana a dara, wenno oxihenada ken dadduma a sustansia sakbay wenno iti pannakaipasngayna. Mabalin pay a gapu ti serioso a pannakasugat ti ulo, inpeksion a maapektaran ti utek wenno meningitis. Wenno problema a naiyalis manipud nagannak a makaapektar ti husto a panagdevelop ti utek. Dagiti dadduma ket awan pay gapgapuna.

Naimbag unay ta addan a naipasdek ti STAC iti ciudad a pakaagasan dagiti ubbing, mangted namnama kadakuada ken kadagiti nagannak. Inestoria ni Kriejielyn a naipasdek ti sentro babaen ti gobierno ti ciudad nga idauluan ni Mayor Eva Marie S Medina. Ket iti lima a tawenen daytoy a sentro addan 88 a natultulunganna. Dagiti dadduma ket aggapuda pay iti sabali nga ili ti probinsia. Numan pay adda tallo a natay kadagitoy a pasiente, sitatalek dagiti empleado iti Namarsua ken ti panagtitinnulong ti gobierno, dagiti nagduduma a sector ti komunidad ken dagiti nagannak a mataripato latta a nalaing dagiti pasiente ket lumaingda a lumaing.

Iti inagurasion ti sentro idi Oktobre 1, 2007, kuna ni Bise Mayor Francisco Ranches a ti ciudad ti Vigan ket saan laeng a sensitibo iti kasapulan iti inprastraktura ken ekonomia dagiti agindeg. sensitibo pay kadagiti especial a kasapulan dagiti ubbing particular dagiti addaan ti dakes a naaramid iti bagida. Ipakpakita ngarud ti pannakaipasdek ti sentro a talaga a child-friendly ti ciudad, wenno ipangpangrunana ti pannakaited dagiti karbengan dagiti ubbing. Daytoy ti mangmangted ti importansia kadagiti ubbing a namnama ti pagilian. Bay-an tayo ngarud dagiti ubbing a dumakkel iti normal a kondision. Ket dagiti addaan ti disabilidad mariknada kuma nga isuda ket adu met ti maitulongda iti pagilian. (ANL/ICR-PIA 1 Ilocos Sur)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s